許廷鏗IG開live大談新動向 期間被網民亂入指佢背女友偷食？

[p721ppl]

2021年10月6日週三 下午5:44

2 分鐘文章

許廷鏗Alfred今年3月離開舊公司華納，噚晚（5日）就喺IG開live同網民互動，除咗唱歌仔之外，Alfred仲交代一下自己嘅新動向，例如成立新自家公司「自許紀錄」及新歌《佛系人生》將於明日（7日）推出等等，點知去到live嘅尾聲突然有一位網民亂入，指佢背女友偷食及搞大人個肚唔認數等等。

在live中，呢位網友「angeltkc」指自己係Alfred嘅女朋友，並留言話：「我都係明星，唔係白撞，有晒證據！仲好意思做《全民造星》導師？又背着女友偷情，又搞大我個肚唔認數，人前人後兩個樣，而家敢做唔敢認？許廷鏗你一係公開我哋情侶關係，一係公開同我道歉！唔好以為咁易甩身！唔信我嘅人，你哋記住我個名Angeltkc！同埋我個樣！等之後Alfred公開拍拖，你哋見到我個名Angeltkc同我個樣就知係我！就知我而家講嘢係事實！」。有傳媒事後向Alfred查詢，佢就話唔認識對方，同埋對方都已經試過幾次咁樣騷擾佢。

睇返IG帳號「angeltkc」，佢就係曾參演電影《#PTGF出租女友》嘅演員曾嘉晴（Angel），不過佢喺今日凌晨時段出就事件發出聲明，指近日多次受到不知名人士喺社交媒體假冒佢嘅帳戶，並向其本人作出滋擾，而佢亦已經向警方報案。