話說小弟當年仲係個小學生, 同屋企人經過旺角, 喺戲院門口外面 睇到 Iron Man 嘅 tailor, 覺得好似幾好睇就入咗去, 用差陽錯踏入咗超級英雄電影的世界, 一開始都只係睇英雄打壞人同埋爆炸特效, 冇太細心咁樣分析劇情, 直到上咗小五小六, <<內戰>>上映 ,發現原來同班有好幾個同學都好鍾意睇MCU, 我哋成日就一 齊討論, 嗰時候我先正式開始以睇一個故事嘅形式去睇MCU嘅電影, 開始思考劇情嘅合理性, 開始思考角色背後的動機, 亦都開始搵漫畫嚟睇( 話說睇咗幾年後仲做咗 DC fans ), 同同學鬥搵采蛋。 升到上中學, 發現身邊嘅新同學反而冇乜留意MCU, 多少有啲沮喪, 好彩小學嘅舊同學都會成日send mesaage一齊討論。 唔經唔覺<<End Game>>上映, 造成唔少哄動, 身邊多咗唔少一日MCU迷, 一個二個喺ig#loveu3000, 當時個心真係有啲五味雜陳。 可能係因為已經接觸過<<守護者>>、<<致命玩笑>>、<<黑暗騎士回歸>>同埋DC嘅電影等作品, 我開始對超級英雄電影嘅反派有更高嘅期望, 希望可以睇到令人同情甚至認同嘅反派。 回頭諗返下 發現好似只有<<homecoming >>嘅Vulture 同埋<<黑豹>>嘅 killmonger 有打動到我, 同時產生咗 MCU嘅電影 有啲流水線嘅感覺。 慢慢就失去咗以往嘅熱血, 直到<<黑寡婦>>一上映, 我更加係完全睇唔明呢一部電影嘅存在有咩意義(可能只有頭 20-30分鐘吸引到我), 突如其來彈出嘅屋企人, 各種唔合理嘅劇情, 由頭去到腳指尾都畀人魔改嘅taskmaster... 都令我一度懷疑marvel 係咪當交功課咁 交咗部戲出嚟畀fans都係交代。 總之而家已經完全冇電影一上映就即刻去睇嘅衝動, 可能過咗好耐, 時間先會上網睇。( 以上全為小弟的個人見解, 如有冒犯,敬請原諒)